Ang Pinakamahusay Na Singer Para Sa Akin

Posted on Agosto 29, 2010

21


Pakinggan natin ang paboritong kanta ng singer na gusto ko.

Wala siyang hits o album na pwedeng maipagmalaki. Wala akong matandaang concert o tv shows man lang na nilabasan. Walang cover sa magazine. Walang fanbase. Walang sariling kanta. Ang tanging mayroon siya,  yung maganda niyang tinig na kapag nagsimula siyang humimig, me mikropono man o wala, titigil ako sandali, mapapamangha at mapapasabing “Siya pa rin ang pinakamusay na singer para sa akin!” At ito ang kanyang kwento:

Bata pa lang siya. Kinakitaan na siya ng angking talento sa pag-awit. Naiinis pa  nga sa kanya ang nakakatanda niyang kapatid. Kasi mas napapansin ng lahat ang boses ng batang ito kesa sa kagalingan ng  kuya niya. Kinder siguro nang magsimula ang rivalry nila, kung may ganoon mang konsepto sa pagitan nila. Kinder si Kuya at dahil likas na pabibo ang batang singer, ayun, isinali siya at ginawang saling-pusa. At sa kanilang pagtatapos, bagaman si Kuya ang napiling First Honor. Mas pinalakpakan ng tao si batang singer nang kumanta ito. Mas lalo tuloy nainis si Kuya nang buhatin si batang singer ng tatay nila. Parang siya talaga ang bida sa pagkakataong iyun.

“Wala ka bang napapansin, sa iyong mga kapaligiran. Kaydumi na ng hangin pati na ang mga ilog natin” Iyan ang unang  kantang naglaban si Kuya at batang singer kalaban din ang isang pinsan niya at iba pang bata noong elementarya sila. Unanimous ang decision ng mga hurado, si batang singer ang nanalo at dinala sa paligsahan kalaban naman ang iba pang mga bata mula sa iba’t ibang paaralan. Tuwang-tuwa ang lahat nang maiuwi niya ang unang pwesto at nagpapansit pa yata ang buong pamilya niya.

Ilang hits na kanta ang dumaan. Ilang kanta ang sumikat-nawala-nirevive. Ilang singers at banda na ang sumikat. Ngunit sa mga iyan, hindi pangalan niya ang naging kakabit. Kung may tagumpay man siya sa larangan ng musika, iyun ay limitado lamang sa mga singing contests na sinalihan niya sa piyesa ng idolo niyang si Celine Dion. Maliban doon, wala na.

Pero sandali, sumikat pala siya. Yun nga lang sa pamilya niya at sa ilang mga taong natulungan niya. Nasa rurok siya noon ng kasikatan nang kumikita na siya at nagtatrabaho sa isang factory sa Laguna. Sikat na sikat siya noon. Parang artista. Kahit anong hilingin ng mga kapatid, naibibigay niya. Nakakatulong na siya sa Tatay at Nanay niya at sa ilang kamag-anak na nangungutang sa kanya. Hindi man siya nakapagkolehiyo, naiangat niya ang kalidad ng buhay ng pamilya niya. Madiskarte kumbaga samantalang ang Kuya naman niya ay mas pinili ang daang pag-aaral sa kolehiyo.

Ilang hits na kanta ang dumaan. Ilang kanta ang sumikat-nawala-nirevive. Ilang singers at banda na ang sumikat. At oo, sumikat na rin ang kanyang bituin, lamang ang kanyang entablado ay  ang pagtulong sa pamilya. Iyon ang kanyang tagumpay.

Ngunit tulad ng lahat ng mga singer o artista, dumarating ang mga pagkakataong magbabagsak sa kanya. Sabi nga nila sa showbizness, hindi pwedeng magsabay ang career at lovelife. Lovelife ang pinili niya.

Umibig ang singer. Umibig ang singer sa taong ni hindi pinangarap ng pamilya niya para sa kanya. Umibig siya sa taong mas mahirap pa sa kanya. Ano nga namang buhay ang haharapin niya? Nagbunga ang kanilang pag-ibig lingid sa kanyang pamilya. Sinubukan niyang lumayo pero hinanap siya ng pamilya niya. Kahit paano, bituin pa rin siya sa pugad na kanyang pinagmulan. At siya’y natagpuan. Tinulungang makabangon, tinulungan siya ng Kuya niya.

Pangarap niya noong maging singer. Pangarap niya noong magkaroon ng sariling kanta na maalala ng lahat. Pangarap niyang sumikat, makilala at hangaan.

Naglaho ang lahat. Nagbago ang lahat dahil sa isa ring pangarap. Iyun ay ang pagkakaroon ng simpleng buhay kasama ang mahal niya.

jessielyn's little angel

Concert ang performance niya kapag naghehele siya sa dalawa niya ngayong tsikiting. May kilig ang duet nila ng asawa niya tuwing kakanta sila sa videoke. Hawak kamay din sila sa mga hamon ng buhay may-asawa. At lalo pang ginagamit ngayon ang kanyang tinig upang magbigay papuri sa Panginoon sa choir na sinalihan niya.

At muling nagningning ang kanyang bituin!

Jess, ikaw pa rin ang pinakamagaling na singer para sa akin. Andito si Kuya Lipadlaya, parating humahanga.

At kahit hindi kaya ng boses ko, gusto kitang makaduet sa kantang paborito mo.